Thyestes

Seneca, Lucius Annaeus

Seneca, Lucius Annaeus, ca. 4 B.C.-65 A.D, creator; Peiper, Rudolf, 1834-1898, editor; Richter, Gustav, 1838-1904, editor

  1. spument aena, membra per partes eant
  2. discerpta, patruos polluat sanguis focos,
  3. epulae instruantur— non novi sceleris tibi
  4. conviva venies, liberum dedimus diem
  5. tuamque ad istas solvimus mensas famem:
  6. ieiunia exple, mixtus in Bacchum cruor
  7. spectante te potetur; inveni dapes
  8. quas ipse fugeres— siste, quo praeceps ruis?
Tant.
  1. Ad stagna et amnes et recedentes aquas
  2. labrisque ab ipsis arboris plenae fugas.
  3. abire in atrum carceris liceat mei
  4. cubile, liceat, si parum videor miser,
  5. mutare ripas: alveo medius tuo,
  6. Phlegethon, relinquar igneo cinctus freto.
  7. quicumque poenas lege fatorum datas
  8. pati iuberis, quisquis exeso iaces
  9. pavidus sub antro iamque venturi times
  10. montis ruinam, quisquis avidorum feros
  11. rictus leonum et dira Furiarum agmina
  12. implicitus horres, quisquis immissas faces