Phoenissae

Seneca, Lucius Annaeus

Seneca, Lucius Annaeus, ca. 4 B.C.-65 A.D, creator; Peiper, Rudolf, 1834-1898, editor; Richter, Gustav, 1838-1904, editor

  1. precor sororis et per irati sibi
  2. genas parentis, scelere quas nullo nocens,
  3. erroris a se dira supplicia exigens,
  4. hausit: nefandas moenibus patriis faces
  5. averte, signa bellici retro agminis
  6. flecte— ut recedas, magna pars sceleris tamen
  7. vestri peracta est: vidit hostili grege
  8. campos repleri patria, fulgentes procul
  9. armis catervas vidit, equitatu levi
  10. Cadmea frangi prata et excelsos rotis
  11. volitare proceres, igne flagrantes trabes
  12. fumare, cineri quae petunt nostras domos,
  13. fratresque (facinus quod novum et Thebis fuit)
  14. in se ruentes: totus hoc exercitus,
  15. hoc populus omnis, utraque hoc vidit soror
  16. genetrixque vidi: nam pater debet sibi
  17. quod ista non spectavit, occurrat tibi
  18. nunc Oedipus, quo iudice erroris quoque
  19. poenae petuntur. ne, precor, ferro erue
  20. patriam ac penates neve, quas regere expetis,