Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Aquam rogavit media nocte ancillulam,
  2. Quae forte dominae tunc assistebat suae
  3. Dormitum eunti; namque lucubraverat
  4. Et usque in serum vigilias perduxerat.
  5. Paulum reclusis foribus miles prospicit
  6. Videtque et aegram et facie pulchra feminam.
  7. Corruptus animus ilico succenditur
  8. Et uritur impudentis sensim cupiditas.
  9. Sollers acumen mille causas invenit,
  10. Per quas videre possit illam saepius.
  11. Cotidiana capta consuetudine
  12. Paulatim facta est advenae submissior;
  13. Mox artior revinxit animum copula.
  14. Hic dum consumit noctes custos diligens,
  15. Desideratum est corpus ex una cruce.
  16. Turbatus miles factum exponit mulieri.
  17. At sancta mulier: Non est quod timeas, ait,
  18. Virique corpus tradit figendum cruci,
  19. Ne subeat ille poenas neglegentiae.
  20. Sic turpitudo laudis obsedit locum.