Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Angusto in aditu taurus luctans cornibus
  2. Cum vix intrare posset ad praesepia,
  3. Monstrabat vitulus quo se pacto plecteret.
  4. Tace inquit ante hoc novi quam tu natus es.
  5. Qui doctiorem emendat sibi dici putet.
  1. Adversus omnes fortis veloces feras
  2. Canis cum domino semper fecisset satis,
  3. Languere coepit annis ingravantibus.
  4. Aliquando obiectus hispidi pugnae suis
  5. Arripuit aurem, sed cariosis dentibus
  6. Praedam dimisit. Hic tunc venator dolens
  7. Canem obiurgabat. Cui latrans contra senex:
  8. Non te destituit animus, sed vires meae.
  9. Quod fuimus laudas, si iam damnas quod sumus.
  10. Hoc cur, Philete, scripserim, pulchre vides.
  1. Vulpem rogabat partem caudae simius,
  2. Contegere honeste posset ut nudas nates;