Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Cursu volucri, pendens in novacula,
  2. Calvus, comosa fronte, nudo corpore,
  3. (Quem si occuparis, teneas; elapsum semel
  4. Non ipse possit Iuppiter reprehendere),
  5. Occasionem rerum significat brevem.
  6. Effectus impediret ne segnis mora,
  7. Finxere antiqui talem effigiem Temporis.
  1. Angusto in aditu taurus luctans cornibus
  2. Cum vix intrare posset ad praesepia,
  3. Monstrabat vitulus quo se pacto plecteret.
  4. Tace inquit ante hoc novi quam tu natus es.
  5. Qui doctiorem emendat sibi dici putet.
  1. Adversus omnes fortis veloces feras
  2. Canis cum domino semper fecisset satis,
  3. Languere coepit annis ingravantibus.
  4. Aliquando obiectus hispidi pugnae suis
  5. Arripuit aurem, sed cariosis dentibus
  6. Praedam dimisit. Hic tunc venator dolens
  7. Canem obiurgabat. Cui latrans contra senex: