Ibis

Ovid

Ovid. P. Ovidius Naso, Volume 3: Tristia, Ibis, Ex Ponto Libri, Fasti. Ehwald, Rudolf; Merkel, Rudolph; editors. Leipzig: B. G. Teubner, 1889.

  1. Tu quoque , quid dubitas ferales sumere vittas ?
  2. Iam stat , ut ipse vides , funeris ara tui .
  3. Pompa parata tibi est . votis mora tristibus absit :
  4. Da iugulum cultris , hostia dira , meis .
  5. Terra tibi fruges , amnis tibi deneget undas .
  6. Deneget afflatus ventus et aura suos .
  7. Nec tibi sol calidus , nec sit tibi lucida Phoebe,
  8. Destituant oculos sidera clara tuos .
  9. Nec se Vulcanus , nec se tibi praebeat aer,
  10. Nec tibi det tellus nec tibi pontus iter .
  11. Exul , inops erres , alienaque limina lustres ,
  12. Exiguumque petas ore tremente cibum .
  13. Nec corpus querulo , nec mens vacet aegra dolore,
  14. Noxque die gravior sit tibi , nocte dies .
  15. Sisque miser semper , nec sis miserabilis ulli :
  16. Gaudeat adversis femina virque tuis .
  17. Accedat lacrimis odium , dignusque puteris ,
  18. Qui mala cum tuleris plurima , plura feras .
  19. Sitque , quod est rarum , solito defecta favore
  20. Fortunae facies invidiosa tuae .