Ex Ponto
Ovid
Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).
- omnia sunt hominum tenui pendentia filo,
- et subito casu quae valuere, ruunt,
- divitis audita est cui non opulentia Croesi?
- nempe tamen vitam captus ab hoste tulit,
- ille Syracosia modo formidatus in urbe
- vix humili duram reppulit arte famem,
- quid fuerat Magno maius? tamen ille rogavit
- summissa fugiens voce clientis opem.
- cuique viro totus terrarum paruit orbis,
- ---[*](om. optimi codd.)
- ille Iugurthino clarus Cimbroque triumpho,
- quo victrix totiens consule Roma fuit,
- in caeno Marius iacuit cannaque palustri,
- pertulit et tanto multa pudenda viro.
- ludit in humanis divina potentia rebus,
- et certam praesens vix habet [*](habet feret) hora fidem.
- litus ad Euxinum si quis mihi diceret ‘ibis,
- et metues, arcu ne feriare Getae,’
- i, bibe dixissem ‘purgantes pectora sucos,
- quidquid et in tota nascitur Anticyra.’