Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. attigero portum, portu terrebor ab ipso:
  2. plus habet infesta terra timoris aqua.
  3. nam simul insidiis hominum pelagique laboro,
  4. et faciunt geminos ensis et unda metus,
  5. ille meo vereor ne speret sanguine praedam,
  6. haec titulum nostrae mortis habere velit.
  7. barbara pars laeva est avidaeque adsueta rapinae, [*](ad ethera penne vel substrata (substracta vel subtracta etc.) rapinae: adsueta rapinae Haupt)
  8. quam cruor et caedes bellaque semper habent,
  9. cumque sit hibernis agitatum fluctibus aequor,
  10. pectora sunt ipso turbidiora mari.
  11. quo magis his debes ignoscere, candide lector,
  12. si spe sunt, ut sunt, inferiora tua.
  13. non haec in nostris, ut quondam, scripsimus[*](scribimus) hortis,
  14. nec, consuete, meum, lectule, corpus habes,
  15. iactor in indomito brumali luce profundo
  16. ipsaque caeruleis charta feritur aquis.
  17. improba pugnat hiems indignaturque quod ausim
  18. scribere se rigidas incutiente minas,
  19. vincat hiems hominem! sed eodem tempore, quaeso,
  20. ipse modum statuam carminis, illa sui.