Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. ‘cur igitur Gallos, qui se excidere, vocamus,
  2. cum tanto a Phrygia Gallica distet humus?’
  3. inter ait ‘viridem Cybelen altasque Celaenas
  4. amnis it insana, nomine Gallus, aqua.
  5. qui bibit inde, furit: procul hinc discedite, quis est
  6. cura bonae mentis: qui bibit inde, furit.’,
  7. non pudet herbosum dixi ‘posuisse moretum
  8. in dominae mensis, an sua causa subest?’
  9. ‘lacte mero veteres usi narrantur et herbis,
  10. sponte sua si quas terra ferebat’ ait.
  11. ‘candidus elisae miscetur caseus herbae,
  12. cognoscat priscos ut dea prisca cibos.’
    [*](5. G NON LVNI)
  13. Postera cum caelo motis Pallantias astris
  14. fulserit, et niveos Luna levarit equos,
  15. qui dicet ‘quondam sacrata est colle Quirini
  16. hac Fortuna die Publica,’ verus erit. [*](6. HNP LVDI 7. AN LVDI 8. BN LVDI 9- CN LVDI)
  17. Tertia lux (memini) ludis erat, ac mihi quidam
  18. spectanti senior continuusque loco
  19. haec ait ‘illa dies, Libycis qua Caesar in oris
  20. perfida magnanimi contudit arma Iubae.