Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. nec telis armisque potest. Pulmonibus errat
  2. ignis edax imis perque omnes pascitur artus.
  3. At valet Eurystheus!—et sunt qui credere possint
  4. esse deos!” Dixit, perque altam saucius Oeten
  5. haud aliter graditur, quam si venabula taurus
  6. corpore fixa gerat, factique refugerit auctor.
  7. Saepe illum gemitus edentem, saepe frementem,
  8. saepe retemptantem totas infringere vestes
  9. sternentemque trabes irascentemque videres
  10. montibus aut patrio tendentem bracchia caelo.
  11. Ecce Lichan trepidum latitantem rupe cavata
  12. adspicit, utque dolor rabiem conlegerat omnem,
  13. “tune, Licha,” dixit “feralia dona dedisti?
  14. Tune meae necis auctor eris?” Tremit ille pavetque
  15. pallidus et timide verba excusantia dicit.
  16. Dicentem genibusque manus adhibere parantem
  17. corripit Alcides et terque quaterque rotatum
  18. mittit in Euboicas tormento fortius undas.
  19. Ille per aerias pendens induruit auras,
  20. utque ferunt imbres gelidis concrescere ventis,