Metamorphoses
Ovid
Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.
- auxiliumque domus servatoremque fatentur
- Cassiope Cepheusque pater. Resoluta catenis
- incedit virgo, pretiumque et causa laboris.
- Ipse manus hausta victrices abluit unda,
- anguiferumque caput dura ne laedat harena,
- mollit humum foliis natasque sub aequore virgas
- sternit et inponit Phorcynidos ora Medusae.
- Virga recens bibulaque etiamnum viva medulla
- vim rapuit monstri tactuque induruit huius
- percepitque novum ramis et fronde rigorem.
- At pelagi nymphae factum mirabile temptant
- pluribus in virgis et idem contingere gaudent
- seminaque ex illis iterant iactata per undas.
- Nunc quoque curaliis eadem natura remansit,
- duritiam tacto capiant ut ab aere, quodque
- vimen in aequore erat, fiat super aequora saxum.