Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Tu face nescio quos esto contentus amores
  2. inritare tua, nec laudes adsere nostras.”
  3. Filius huic Veneris “figat tuus omnia, Phoebe,
  4. te meus arcus:” ait “quantoque animalia cedunt
  5. cuncta deo tanto minor est tua gloria nostra.”
  6. Dixit et eliso percussis aere pennis
  7. inpiger umbrosa Parnasi constitit arce
  8. eque sagittifera prompsit duo tela pharetra
  9. diversorum operum: fugat hoc, facit illud amorem.
  10. Quod facit, auratum est et cuspide fulget acuta;
  11. quod fugat, obtusum est et habet sub harundine plumbum.
  12. Hoc deus in nympha Peneide fixit, at illo
  13. laesit Apollineas traiecta per ossa medullas.
  14. Protinus alter amat, fugit altera nomen amantis
  15. silvarum tenebris captivarumque ferarum
  16. exuviis gaudens innuptaeque aemula Phoebes.
  17. Vitta coercebat positos sine lege capillos.
  18. Multi illam petiere, illa aversata petentes
  19. inpatiens expersque viri nemora avia lustrat,
  20. nec quid Hymen, quid Amor, quid sint conubia curat.