Epistulae

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Et bene narraris letum taurique virique
  2. Sectaque per dubias saxea tecta vias,
  3. Me quoque narrato sola tellure relictam!
  4. Non ego sum titulis subripienda tuis.
  5. Nec pater est Aegeus, nec tu Pittheidos Aethrae
  6. Filius; auctores saxa fretumque tui!
  7. Di facerent, ut me summa de puppe videres;
  8. Movisset vultus maesta figura tuos!
  9. Nunc quoque non oculis, sed, qua potes, adspice mente
  10. Haerentem scopulo, quem vaga pulsat aqua.
  11. Adspice demissos lugentis more capillos
  12. Et tunicas lacrimis sicut ab imbre gravis.