Amores
Ovid
Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.
- Exit in inmensum fecunda licentia vatum,
- Obligat historica nec sua verba fide.
- Et mea debuerat falso laudata videri
- Femina; credulitas nunc mihi vestra nocet.
- Cum mihi pomiferis coniunx foret orta Faliscis,
- Moenia contigimus victa, Camille, tibi.
- Casta sacerdotes Iunoni festa parabant
- Et celebres ludos indigenamque bovem;
- Grande morae pretium ritus cognoscere, quamvis
- Difficilis clivis huc via praebet iter.
- Stat vetus et densa praenubilus arbore lucus;
- Adspice — concedas numen inesse loco.
- Accipit ara preces votivaque tura piorum —
- Ara per antiquas facta sine arte manus.
- Hinc, ubi praesonuit sollemni tibia cantu,
- It per velatas annua pompa vias;
- Ducuntur niveae populo plaudente iuvencae,
- Quas aluit campis herba Falisca suis,
- Et vituli nondum metuenda fronte minaces,
- Et minor ex humili victima porcus hara,