Amores

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Non ego mendosos ausim defendere mores
  2. Falsaque pro vitiis arma movere meis.
  3. Confiteor — siquid prodest delicta fateri;
  4. In mea nunc demens crimina fassus eo.
  5. Odi, nec possum, cupiens, non esse quod odi;
  6. Heu, quam quae studeas ponere ferre grave est!
  7. Nam desunt vires ad me mihi iusque regendum;
  8. Auferor ut rapida concita puppis aqua.
  9. Non est certa meos quae forma invitet amores —
  10. Centum sunt causae, cur ego semper amem.
  11. Sive aliqua est oculos in humum deiecta modestos,
  12. Uror, et insidiae sunt pudor ille meae;
  13. Sive procax aliqua est, capior, quia rustica non est,
  14. Spemque dat in molli mobilis esse toro.
  15. Aspera si visa est rigidasque imitata Sabinas,
  16. Velle, sed ex alto dissimulare puto.
  17. Sive es docta, places raras dotata per artes;
  18. Sive rudis, placita es simplicitate tua.
  19. Est, quae Callimachi prae nostris rustica dicat
  20. Carmina — cui placeo, protinus ipsa placet.