Amores

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Nil opus est bello — veniam pacemque rogamus;
  2. Nec tibi laus armis victus inermis ero.
  3. Necte comam myrto, maternas iunge columbas;
  4. Qui deceat, currum vitricus ipse dabit,
  5. Inque dato curru, populo clamante triumphum,
  6. Stabis et adiunctas arte movebis aves.
  7. Ducentur capti iuvenes captaeque puellae;
  8. Haec tibi magnificus pompa triumphus erit.
  9. Ipse ego, praeda recens, factum modo vulnus habebo
  10. Et nova captiva vincula mente feram.
  11. Mens Bona ducetur manibus post terga retortis,
  12. Et Pudor, et castris quidquid Amoris obest.
  13. Omnia te metuent; ad te sua bracchia tendens
  14. Vulgus 'io' magna voce 'triumphe!' canet.
  15. Blanditiae comites tibi erunt Errorque Furorque,
  16. Adsidue partes turba secuta tuas.
  17. His tu militibus superas hominesque deosque;
  18. Haec tibi si demas commoda, nudus eris.
  19. Laeta triumphanti de summo mater Olympo
  20. Plaudet et adpositas sparget in ora rosas.