Amores

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Iam super oceanum venit a seniore marito
  2. Flava pruinoso quae vehit axe diem.
  3. 'Quo properas, Aurora? mane! — sic Memnonis umbris
  4. Annua sollemni caede parentet avis!
  5. Nunc iuvat in teneris dominae iacuisse lacertis;
  6. Si quando, lateri nunc bene iuncta meo est.
  7. Nunc etiam somni pingues et frigidus aer,
  8. Et liquidum tenui gutture cantat avis.
  9. Quo properas, ingrata viris, ingrata puellis?
  10. Roscida purpurea supprime lora manu!
  11. Ante tuos ortus melius sua sidera servat
  12. Navita nec media nescius errat aqua;
  13. Te surgit quamvis lassus veniente viator,
  14. Et miles saevas aptat ad arma manus.
  15. Prima bidente vides oneratos arva colentes;
  16. Prima vocas tardos sub iuga panda boves.
  17. Tu pueros somno fraudas tradisque magistris,
  18. Ut subeant tenerae verbera saeva manus;
  19. Atque vades sponsum stultos ante Atria mittis,
  20. Unius ut verbi grandia damna ferant.