Odes

Horace

Horace, creator; Shorey, Paul, 1857-1934, editor; Laing, Gordon Jennings, 1869-, joint editor; Laing, Gordon Jennings, 1869-1945, joint editor

  • Descende caelo et dic age tibia
  • regina longum Calliope melos,
  • seu voce nunc mavis acuta
  • seu fidibus citharave Phoebi.
  • auditis? an me ludit amabilis
  • insania? audire et videor pios
  • errare per lucos, amoenae
  • quos et aquae subeunt et aurae.
  • me fabulosae Volture in Apulo
  • nutricis extra limina Pulliae
  • ludo fatigatumque somno
  • fronde nova puerum palumbes
  • texere, mirum quod foret omnibus
  • quicumque celsae nidum Aceruntiae
  • saltusque Bantinos et arvum
  • pingue tenent humilis Forenti,
  • ut tuto ab atris corpore viperis
  • dormirem et ursis, ut premerer sacra
  • lauroque conlataque myrto
  • non sine dis animosus infans.