Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  • nam quae nivali pascitur Algido
  • devota quercus inter et ilices
  • aut crescit Albanis in herbis
  • victima, pontificum securis
  • cervice tinguet: te nihil attinet
  • temptare multa caede bidentium
  • parvos coronantem marino
  • rore deos fragilique myrto.
  • inmunis aram si tetigit manus,
  • non sumptuosa blandior hostia,
  • mollivit aversos Penatis
  • farre pio et saliente mica.
  • Intactis opulentior
  • thesauris Arabum et divitis Indiae
  • caementis licet occupes
  • terrenum omne tuis et mare publicum:
  • si figit adamantinos
  • summis verticibus dira Necessitas
  • clavos, non animum metu,
  • non mortis laqueis expedies caput.