Odes

Horace

Horace, creator; Shorey, Paul, 1857-1934, editor; Laing, Gordon Jennings, 1869-, joint editor; Laing, Gordon Jennings, 1869-1945, joint editor

  • Ne sit ancillae tibi amor pudori,
  • Xanthia Phoceu: prius insolentem
  • serva Briseis niveo colore
  • movit Achillem,
  • movit Aiacem Telamone natum
  • forma captivae dominum Tecmessae,
  • arsit Atrides medio in triumpho
  • virgine rapta,
  • barbarae postquam cecidere turmae
  • Thessalo victore et ademptus Hector
  • tradidit fessis leviora tolli
  • Pergama Grais.
  • nescias an te generum beati
  • Phyllidis flavae decorent parentes:
  • regium certe genus, et penatis
  • maeret iniquos.
  • crede non illam tibi de scelesta
  • plebe dilectam neque sic fidelem,
  • sic lucro aversam potuisse nasci
  • matre pudenda.