Odes

Horace

Horace, creator; Shorey, Paul, 1857-1934, editor; Laing, Gordon Jennings, 1869-, joint editor; Laing, Gordon Jennings, 1869-1945, joint editor

  • proeliis audax. neque te silebo,
  • Liber et saevis inimica virgo
  • beluis, nec te, metuende certa
  • Phoebe sagitta.
  • dicam et Alciden puerosque Ledae,
  • hunc equis, illum superare pugnis
  • nobilem; quorum simul alba nautis
  • stella refulsit,
  • defluit saxis agitatus umor,
  • concidunt venti fugiuntque nubes
  • et minax, quia sic voluere, ponto
  • unda recumbit.
  • Romulum post hos prius an quietum
  • Pompili regnum memorem, an superbos
  • Tarquini fascis, dubito, an Catonis
  • nobile letum:
  • Regulum et Scauros animaeque magnae
  • prodigum Paulum superante Poeno
  • gratus insigni referam camena
  • Fabriciumque.