Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  1. Tu ne quaesieris, scire nefas, quem mihi, quem tibi
  2. finem di dederint, Leuconoe, nec Babylonios
  3. temptaris numeros. ut melius, quidquid erit, pati.
  4. seu pluris hiemes seu tribuit Iuppiter ultimam,
  5. quae nunc oppositis debilitat pumicibus mare
  6. Tyrrhenum: sapias, vina liques et spatio brevi
  7. spem longam reseces. dum loquimur, fugerit invida
  8. aetas: carpe diem quam minimum credula postero.