Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Ibat et Hippolyti proles pulcherrima bello,
  2. Virbius, insignem quem mater Aricia misit,
  3. eductum Egeriae lucis umentia circum
  4. litora, pinguis ubi et placabilis ara Dianae.
  5. Namque ferunt fama Hippolytum, postquam arte novercae
  6. occiderit patriasque explerit sanguine poenas
  7. turbatis distractus equis, ad sidera rursus
  8. aetheria et superas caeli venisse sub auras,
  9. Paeoniis revocatum herbis et amore Dianae.
  10. Tum pater omnipotens, aliquem indignatus ab umbris
  11. mortalem infernis ad lumina surgere vitae,
  12. ipse repertorem medicinae talis et artis
  13. fulmine Phoebigenam Stygias detrusit ad undas.
  14. At Trivia Hippolytum secretis alma recondit
  15. sedibus et nymphae Egeriae nemorique relegat,
  16. solus ubi in silvis Italis ignobilis aevom
  17. exigeret versoque ubi nomine Virbius esset.
  18. Unde etiam templo Triviae lucisque sacratis
  19. cornipedes arcentur equi, quod litore currum
  20. et iuvenem monstris pavidi effudere marinis.