Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. nunc animis opus, Aenea, nunc pectore firmo.
  2. Tantum effata, furens antro se immisit aperto;
  3. ille ducem haud timidis vadentem passibus aequat.
  4. Di, quibus imperium est animarum, umbraeque silentes,
  5. et Chaos, et Phlegethon, loca nocte tacentia late,
  6. sit mihi fas audita loqui; sit numine vestro
  7. pandere res alta terra et caligine mersas!
  8. Ibant obscuri sola sub nocte per umbram,
  9. perque domos Ditis vacuas et inania regna:
  10. quale per incertam lunam sub luce maligna
  11. est iter in silvis, ubi caelum condidit umbra
  12. Iuppiter, et rebus nox abstulit atra colorem.
  13. Vestibulum ante ipsum, primisque in faucibus Orci
  14. Luctus et ultrices posuere cubilia Curae;
  15. pallentesque habitant Morbi, tristisque Senectus,
  16. et Metus, et malesuada Fames, ac turpis Egestas,
  17. terribiles visu formae: Letumque, Labosque;
  18. tum consanguineus Leti Sopor, et mala mentis
  19. Gaudia, mortiferumque adverso in limine Bellum,
  20. ferreique Eumenidum thalami, et Discordia demens,