Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. nec miseram effugiunt mortem, sed limine in ipso,
  2. moenibus in patriis atque inter tuta domorum
  3. confixi exspirant animas. Pars claudere portas:
  4. nec sociis aperire viam nec moenibus audent
  5. accipere orantis, oriturque miserrima caedes
  6. defendentum armis aditus inque arma ruentum.
  7. Exclusi ante oculos lacrumantumque ora parentum
  8. pars in praecipitis fossas urgente ruina
  9. volvitur, immissis pars caeca et concita frenis
  10. arietat in portas et duros obice postis.
  11. Ipsae de muris summo certamine matres,
  12. monstrat amor verus patriae, ut videre Camillam,
  13. tela manu trepidae iaciunt ac robore duro
  14. stipitibus ferrum sudibusque imitantur obustis
  15. praecipites primaeque mori pro moenibus ardent.
  16. Interea Turnum in silvis saevissimus implet
  17. nuntius, et iuveni ingentem fert Acca tumultum:
  18. deletas Volscorum acies, cecidisse Camillam,
  19. ingruere infensos hostis et Marte secundo
  20. omnia corripuisse, metum iam ad moenia ferri.