Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Multae illam frustra Tyrrhena per oppida matres
  2. optavere nurum: sola contenta Diana
  3. aeternum telorum et virginitatis amorem
  4. intemerata colit. Vellem haud correpta fuisset
  5. militia tali, conata lacessere Teucros:
  6. cara mihi comitumque foret nunc una mearum.
  7. Verum age, quandoquidem fatis urgetur acerbis,
  8. abere, nympha, polo finisque invise Latinos,
  9. tristis ubi infausto committitur omine pugna.
  10. Haec cape et ultricem pharetra deprome sagittam:
  11. hac quicumque sacrum violarit volnere corpus,
  12. Tros Italusque, mihi pariter det sanguine poenas.
  13. Post ego nube cava miserandae corpus et arma
  14. inspoliata feram tumulo patriaeque reponam.
  15. Dixit; at illa levis caeli delapsa per auras
  16. insonuit, nigro circumdata turbine corpus.
  17. At manus interea muris Troiana propinquat
  18. Etruscique duces equitumque exercitus omnis,
  19. compositi numero in turmas. Fremit aequore toto
  20. insultans sonipes et pressis pugnat habenis