Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. quis Amythaonius nequeat certare Melampus.
  2. Nam modo fulgentem Tyrio subtegmine uestem
  3. indueras oriente die duce fertilis anni,
  4. splendidior liquidis cum Sol caput extulit undis
  5. et fera discordes tenuerunt flamina uenti,
  6. curua nec adsuetos egerunt flumina cursus,
  7. quin rapidum placidis etiam mare constitit undis,
  8. ulla nec aerias uolucris perlabitur auras
  9. nec quadrupes densas depascitur aspera siluas,
  10. quin largita tuis sunt muta silentia uotis.
  11. Iuppiter ipse leui uectus per inania curru
  12. adfuit et caelo uicinum liquit Olympum
  13. intentaque tuis precibus se praebuit aure
  14. cunctaque ueraci capite adnuit: additus aris
  15. laetior eluxit structos super ignis aceruos.
  16. Quin hortante deo magnis insistere rebus
  17. incipe; non idem tibi sint aliisque triumphi:
  18. non te uicino remorabitur obuia marte
  19. Gallia nec latis audax Hispania terris
  20. nec fera Theraeo tellus obsessa colono,