Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Care puer, madeant generoso pocula baccho,
  2. et nobis prona funde Falerna manu.
  3. Ite procul durum curae genus, ite labores;
  4. fulserit hic niueis Delius alitibus.
  5. Vos modo proposito dulces faueatis amici,
  6. neue neget quisquam me duce se comitem,
  7. aut si quis uini certamen mite recusat,
  8. fallat eum tecto cara puella dolo.
  9. Ille facit dites animos deus, ille ferocem
  10. contundit et dominae misit in arbitrium,
  11. Armenias tigres et fuluas ille leaenas
  12. uicit et indomitis mollia corda dedit.
  13. Haec Amor et maiora ualet; sed poscite Bacchi
  14. munera: quem uestrum pocula sicca iuuant?
  15. Conuenit ex aequo nec toruus Liber in illis
  16. qui se quique una uina iocosa colunt,
  17. nunc uenit iratus nimium nimiumque seueris:
  18. qui timet irati numina magna, bibat.
  19. Quales his poenas qualis quantusque minetur,
  20. Cadmeae matris praeda cruenta docet.