Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Ite procul uani falsique auertite uisus,
  2. desinite in nobis quaerere uelle fidem.
  3. Diui uera monent, uenturae nuntia sortis
  4. uera monent Tuscis exta probata uiris;
  5. somnia fallaci ludunt temeraria nocte
  6. et pauidas mentes falsa timere iubent;
  7. et natum in curas hominum genus omina noctis
  8. farre pio placant et saliente sale!
  9. Et tamen, utcumque est, siue illi uera moneri,
  10. mendaci somno credere siue uolent,
  11. efficiat uanos noctis Lucina timores
  12. et frustra inmeritum pertimuisse uelit,
  13. si mea nec turpi mens est obnoxia facto
  14. nec laesit magnos impia lingua deos.
  15. Iam Nox aetherium nigris emensa quadrigis
  16. mundum cacruleo lauerat amne rotas,
  17. nec me sopierat menti deus utilis aegrae:
  18. Somnus sollicitas deficit ante domos.
  19. Tandem, cum summo Phoebus prospexit ab ortu,
  20. pressit languentis lumina sera quies.