Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Nam graue quid prodest pondus mihi diuitis auri,
  2. aruaque si findant pinguia mille boues?
  3. Quidue domus prodest Phrygiis innixa columnis,
  4. Taenare siue tuis, siue Caryste tuis,
  5. et nemora in domibus sacros imitantia lucos
  6. aurataeque trabes marmoreumque solum?
  7. Quidue in Erythraeo legitur quae litore concha
  8. tinctaque Sidonio murice lana iuuat,
  9. et quae praeterea populus miratur? In illis
  10. inuidia est: falso plurima uulgus amat.
  11. Non opibus mentes hominum curaeque leuantur
  12. nec Fortuna sua tempora lege regit.
  13. Sit mihi paupertas tecum iucunda, Neaera:
  14. at sine te regum munera nulla uolo.
  15. O niueam quae te poterit mihi reddere lucem!
  16. O mihi felicem terque quaterque diem!
  17. At si, pro dulci reditu quaecumque uouentur,
  18. audiat auersa non meus aure deus,
  19. nec me regna iuuant nec Lydius aurifer amnis
  20. nec quas terrarum sustinet orbis opes.