Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. ante meum ueniat longos incompta capillos
  2. et fleat ante meum maesta Neaera rogum;
  3. sed ueniat carae matris comitata dolore:
  4. maereat haec genero, maereat illa uiro.
  5. Praefatae ante meos manes animamque precatae
  6. perfusaeque pias ante liquore manus,
  7. pars quae sola mei superabit corporis, ossa
  8. incinctae nigra candida ueste legent
  9. et primum annoso spargent collecta lyaeo,
  10. mox etiam niueo lacte parent,
  11. post haec carbaseis umorem tollere uelis
  12. atque in marmorea ponere sicca domo.
  13. Illic quas mittit diues Panchaia merces
  14. Eoique Arabes, diues et Assyria,
  15. et nostri memores lacrimae fundantur eodem:
  16. sic ego componi uersus in ossa uelim.
  17. Sed tristem mortis demonstret littera causam
  18. atque haec in celebri carmina fronte notet:
  19. Lygdamus hic situs est: dolor huic et cura Neaerae,
  20. coniugis ereptae, causa perire fuit.