Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Natalis Iuno, sanctos cape turis aceruos,
  2. quos tibi dat tenera docta puella manu;
  3. tota tibi est hodie, tibi se laetissima compsit,
  4. staret ut ante tuos conspicienda focos.
  5. Illa quidem ornandi causas tibi, diua, relegat;
  6. est tamen, occulte cui placuisse uelit.
  7. At tu, sancta, faue, neu quis diuellat amantes,
  8. sed iuueni, quaeso, mutua uincla para.
  9. Sic bene compones: ullae non ille puellae
  10. seruire aut cuiquam dignior illa uiro.