Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. (Romulus aeternae nondum formauerat urbis
  2. moenia, consorti non habitanda Remo;
  3. sed tunc pascebant herbosa Palatia uaccae
  4. et stabant humiles in Iouis arce casae.
  5. lacte madens illic suberat Pan ilicis umbrae
  6. et facta agresti lignea falce Pales,
  7. pendebatque uagi pastoris in arbore uotum,
  8. garrula siluestri fistula sacra deo,
  9. fistula cui semper decrescit harundinis ordo:
  10. nam calamus cera iungitur usque minor.
  11. at qua Velabri regio patet, ire solebat
  12. exiguus pulsa per uada linter aqua.
  13. illa saepe gregis diti placitura magistro
  14. ad iuuenem festa est uecta puella die,
  15. cum qua fecundi redierunt munera ruris,
  16. caseus et niueae candidus agnus ouis.)
  17. ‘Impiger Aenea, uolitantis frater Amoris,
  18. Troica qui profugis sacra uehis ratibus,
  19. iam tibi Laurentes adsignat Iuppiter agros,
  20. iam uocat errantes hospita terra Lares.