Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. auguror, uxoris fidos optabis amores:
  2. iam reor hoc ipsos edidicisse deos.
  3. nec tibi malueris, totum quaecumque per orbem
  4. fortis arat ualido rusticus arua boue,
  5. nec tibi, gemmarum quidquid felicibus Indis
  6. nascitur, Eoi qua maris unda rubet.
  7. uota cadunt: utinam strepitantibus aduolet alis
  8. flauaque coniugio uincula portet Amor,
  9. uincula quae maneant semper dum tarda senectus
  10. inducat rugas inficiatque comas.
  11. haec ueniat, Natalis, auis prolemque ministret,
  12. ludat et ante tuos turba nouella pedes.
  1. Rura meam, Cornute, tenent uillaeque puellam:
  2. ferreus est, heu heu, quisquis in urbe manet.
  3. ipsa Venus latos iam nunc migrauit in agros,
  4. uerbaque aratoris rustica discit Amor.
  5. o ego, cum aspicerem dominam, quam fortiter illic
  6. uersarem ualido pingue bidente solum
  7. agricolaeque modo curuum sectarer aratrum,
  8. dum subigunt steriles arua serenda boues!