Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. At lascivus Amor rixae mala verba ministrat,
  2. Inter et iratum lentus utrumque sedet.
  3. A, lapis est ferrumque, suam quicumque puellam
  4. Verberat: e caelo deripit ille deos.
  5. Sit satis e membris tenuem rescindere vestem,
  6. Sit satis ornatus dissoluisse comae,
  7. Sit lacrimas movisse satis: quater ille beatus,
  8. Quo tenera irato flere puella potest.
  9. Sed manibus qui saevus erit, scutumque sudemque
  10. Is gerat et miti sit procul a Venere.
  11. At nobis, Pax alma, veni spicamque teneto,
  12. Perfluat et pomis candidus ante sinus.
  1. Quisquis adest, faueat: fruges lustramus et agros,
  2. ritus ut a prisco traditus extat auo.
  3. Bacche, ueni, dulcisque tuis e cornibus uua
  4. pendeat, et spicis tempora cinge, Ceres.
  5. luce sacra requiescat humus, requiescat arator,
  6. et graue suspenso uomere cesset opus.
  7. soluite uincla iugis: nunc ad praesepia debent
  8. plena coronato stare boues capite.