De Rerum Natura

Lucretius

-

  1. in parvas igitur partis dispergitur umor,
  2. quas oculi nulla possunt ratione videre.
  3. quin etiam multis solis redeuntibus annis
  4. anulus in digito subter tenuatur habendo,
  5. stilicidi casus lapidem cavat, uncus aratri
  6. ferreus occulte decrescit vomer in arvis,
  7. strataque iam volgi pedibus detrita viarum
  8. saxea conspicimus; tum portas propter aena
  9. signa manus dextras ostendunt adtenuari
  10. saepe salutantum tactu praeterque meantum.
  11. haec igitur minui, cum sint detrita, videmus.