Letters to his Friends
Cicero
Cicero, Marcus Tullius, creator; Purser, Louis Claude, 1854-1932, editor
in omnibus meis epistulis, quas ad Caesarem aut ad Balbum mitto, legitima quaedam est accessio commendationis tuae, nec ea vulgaris sed cum aliquo insigni indicio meae erga te benevolentiae. tu modo ineptias istas et desideria urbis et urbanitatis depone et, quo consilio profectus es, id adsiduitate et virtute consequere. hoc tibi tam ignoscemus nos amici, quam ignoverunt Medeae,
quibus illa manibus gypsatissimis persuasit ne sibi vitio illae verterent, quod abesset a patria; nam
- quaé Corinthum arcem áltam habebant mátronae opulentae, óptimates,
quo in numero tu certe fuisses, nisi te extrusissemus.
- Múlti suam rem béne gessere et públicam patriá procul;
- Múlti, qui domi aétatem agerent, própterea sunt ímprobati.
sed plura scribemus alias. tu, qui ceteris cavere didicisti, in Britannia ne ab essedariis decipiaris caveto et (quoniam Medeam coepi agere) illud semper memento:
cura ut valeas.
- qui ípse sibi sapiéns prodesse nón quit, nequiquám sapit.