Carmina

Catullus

Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.

  1. Quaeris quot mihi basiationes
  2. tuae, Lesbia, sint satis superque.
  3. quam magnus numerus Libyssae harenae
  4. laserpiciferis iacet Cyrenis,
  5. oraclum Iovis inter aestuosi
  6. et Batti veteris sacrum sepulcrum,
  7. aut quam sidera multa, cum tacet nox,
  8. furtivos hominum vident amores,
  9. tam te basia multa basiare
  10. vesano satis et super Catullo est,
  11. quae nec pernumerare curiosi
  12. possint nec mala fascinare lingua.