Carmina
Catullus
Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.
- Disertissime Romuli nepotum,
- quot sunt quotque fuere, Marce Tulli,
- quotque post aliis erunt in annis,
- gratias tibi maximas Catullus
- agit pessimus omnium poeta,
- tanto pessimus omnium poeta
- quanto tu optimus omnium patronus.
- Hesterno, Licini, die otiosi
- multum lusimus in meis tabellis,
- ut convenerat esse delicatos.
- scribens versiculos uterque nostrum
- ludebat numero modo hoc modo illoc,
- reddens mutua per iocum atque vinum.
- atque illinc abii tuo lepore
- incensus, Licini, facetiisque,
- ut nec me miserum cibus iuvaret,
- nec somnus tegeret quiete ocellos,
- sed toto indomitus furore lecto
- versarer cupiens videre lucem,
- ut tecum loquerer simulque ut essem.