Adelphi

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Placet tibi factum, Micio?
Mi.
  1. Non, si queam
  2. Mutare: nunc, quum non queo, aequo animo fero.
  3. Ita vita est hominum quasi quum ludas tesseris:
  4. Si illud quod maxime opus est iactu non cadit,
  5. Illud quod cecidit forte id arte ut corrigas.
De.
  1. Corrector! Nempe tua arte viginti minae
  2. Pro psaltria periere; quae, quantum potest,
  3. Aliquo abiicienda est, si non pretio at gratiis.
Mi.
  1. Neque est, neque illam sane studeo vendere.
De.
  1. Quid igitur facies?
Mi.
  1. Domi erit.
De.
  1. Pro Divum fidem!
  2. Meretrix et materfamilias una in domo?
Mi.
  1. Cur non?
De.
  1. Sanum te credis esse?
Mi.
  1. Equidem arbitror.
De.
  1. Ita me Di ament, ut video ego tuam ineptiam,
  2. Facturum credo ut habeas quicum cantites.
Mi.
  1. Cur non?
De.
  1. Et nova nupta eadem haece discet?
Mi.
  1. Scilicet.
De.
  1. Tu inter eas restim ductans saltabis.
Mi.
  1. Probe.
De.
  1. Probe?
Mi.
  1. Et tu nobiscum una, si opus sit.
De.
  1. Hei mihi!
  2. Non te haec pudent?
Mi.
  1. Iam vero omitte, Demea,
  2. Tuam istanc iracundiam; atque ita uti decet
  3. Hilarum ac libentem fac te gnati in nuptiis.