Adelphi

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Aliquo: persuasit ille impurus, sat scio.
  2. Sed eccum Syrum ire video: hinc scibo iam ubi siet;
  3. Atque hercle hic de grege illo est: si me senserit
  4. Eum quaeritare, nunquam dicet carnifex.
  5. Non ostendam me id velle.
Sy.
  1. Omnem rem modo seni
  2. Quo pacto se haberet enarramus ordine:
  3. Nihil vidi quicquam laetius.
De.
  1. Pro Iupiter,
  2. Hominis stultitiam!
Sy.
  1. Collaudavit filium:
  2. Mihi qui id dedissem consilium egit gratias.
De.
  1. Disrumpor.
Sy.
  1. Argentum annumeravit ilico:
  2. Dedit praeterea in sumtum dimidium minae:
  3. Id distributum sane est ex sententia.
De.
  1. Hem!
  2. Huic mandes, si quid recte curatum velis.
Sy.
  1. Hem, Demea, haud aspexeram te. Quid agitur?
De.
  1. Quid agatur? Vestram nequeo mirari satis
  2. Rationem.
Sy.
  1. Est hercle inepta, ne dicam dolo,
  2. Atque absurda. Pisces ceteros purga, Dromo:
  3. Congrum istum maximum in aqua sinito ludere
  4. Paulisper: ubi ego venero, exossabitur;
  5. Prius nolo.