Hecyra

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Hecyra est huic nomen fabulae: haec cum data
  2. Nova est novum intervenit vitium et calamitas,
  3. Ut neque spectari neque cognosci potuerit.
  4. Ita populus studio stupidus in funambulo
  5. Animum occuparat. Nunc haec plane est pro nova;
  6. Et is qui scripsit hanc ob eam rem noluit
  7. Iterum referre ut iterum posset vendere.
  8. Alias cognostis eius: quaeso hanc nunc noscite.
Prologus
  1. Orator ad vos venio ornatu prologi:
  2. Sinite exorator sim, eodem ut iure uti senem
  3. Liceat quo iure sum usus adolescentior;
  4. Novas qui exactas feci ut inveterascerent,
  5. Ne cum poeta scriptura evanesceret.
  6. In his quas primum Caecili didici novas
  7. Partim sum earum exactus, partim vix steti.
  8. Quia scibam dubiam fortunam esse scenicam,
  9. Spe incerta certum mihi laborem sustuli.
  10. Easdem agere coepi ut ab eodem alias discerem
  11. Novas studiose, ne illum ab studio abducerem.
  12. Perfeci ut spectarentur. Ubi sunt cognitae,