Phormio

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Nam iam adolescenti nihil est quod succenseam,
  2. Si illum minus norat: quippe homo iam grandior,
  3. Pauper, cui opera vita erat, ruri fere
  4. Se continebat: ibi agrum de nostro patre
  5. Colendum habebat. Saepe interea mihi senex
  6. Narrabat se hunc negligere cognatum suum:
  7. At quem virum! quem ego viderim in vita optimum.
Ge.
  1. Videas te atque illum ut narras.
Ph.
  1. I in malam crucem.
  2. Nam nisi ita eum existimassem, nunquam tam graves
  3. Ob hanc inimicitias caperem in vestram familiam,
  4. Quam is aspernatur nunc tam illiberaliter.
Ge.
  1. Pergin hero absenti male loqui, impurissime?
Ph.
  1. Dignum autem hoc illo est.
Ge.
  1. Ain tandem, career?
De.
  1. Geta.
Ge.
  1. Bonorum extortor, legum contortor.
De.
  1. Geta.
Ph.
  1. Responde.
Ge.
  1. Quis homo est? ehem!
De.
  1. Tace.
Ge.
  1. Absenti tibi
  2. Te indignas, seque dignas, contumelias
  3. Nunquam cessavit dicere hodie.
De.
  1. Ohe, desine.
  2. Adolescens, primum abs te hoc bona venia peto,
  3. Si tibi placere potis est, mihi ut respondeas:
  4. Quem amicum tuum ais fuisse istum? explana mihi: