Eunuchus

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Sororem plerique esse credebant meam.
  2. Ego cum illo quicum tum uno rem habebam hospite
  3. Abii huc; qui mihi reliquit haec quae habeo omnia.
Pa.
  1. Utrumque hoc falsum est: effluet.
Th.
  1. Qui istuc?
Pa.
  1. Quia
  2. Neque tu uno eras contenta, neque solus dedit;
  3. Nam hic quoque bonam magnamque partem ad te attulit.
Th.
  1. Ita est: sed sine me pervenire quo volo.
  2. Interea miles qui me amare occeperat
  3. In Cariam est profectus: te interea loci
  4. Cognovi: tute scis postilla quam intumum
  5. Habeam te, et mea consilia ut tibi credam omnia.
Ph.
  1. Ne hoc quidem tacebit Parmeno.
Th.
  1. Oh, dubiumne id est?
  2. Hoc agite amabo. Mater mea illic mortua est
  3. Nuper. Eius frater aliquantum ad rem est avidior.
  4. Is hanc ubi forma videt honesta virginem,
  5. Et fidibus scire, pretium sperans ilico
  6. Producit, vendit. Forte fortuna affuit
  7. Hic meus amicus: emit eam dono mihi,
  8. Imprudens harum rerum ignarusque omnium.