Andria

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Amor, misericordia huius, nuptiarum sollicitatio,
  2. Tum patris pudor qui me tam leni passus animo est usque adhuc
  3. Quae meo quomque animo libitum est facere. Eine ego ut advorser? hei mihi!
  4. Incertum est quid agam.
My.
  1. Misera timeo incertum hoc quorsum accidat.
  2. Sed nunc peropus est, aut hunc cum ipsa, aut me aliquid de illa adversum hunc loqui.
  3. Dum in dubio est animus, paulo momento huc vel illuc impellitur.
Pa.
  1. Quis hic loquitur? Mysis? salve.
My.
  1. O salve, Pamphile.
Pa.
  1. Quid agit?
My.
  1. Rogas?
  2. Laborat e dolore; atque ex hoc misera sollicita est, diem
  3. Quia olim in hunc sunt constitutae nuptiae: tum autem hoc timet,
  4. Ne deseras se.
Pa.
  1. Hem, egone istuc conari queam?
  2. Ego propter me illam decipi miseram sinam
  3. Quae mihi suum animum atque omnem vitam credidit,
  4. Quam ego animo egregie caram pro uxore habuerim?
  5. Bene et pudice eius doctum atque eductum sinam
  6. Coactum egestate ingenium immutarier?
  7. Non faciam.
My.
  1. Haud vereor si in te solo sit situm;
  2. Sed ut vim queas ferre.
Pa.
  1. Adeone me ignavum putas,
  2. Adeone porro ingratum, aut inhumanum, aut ferum,
  3. Ut neque me consuetudo neque amor neque pudor
  4. Commoveat neque commoneat ut servem fidem?