Truculentus

Plautus, Titus Maccius

Plautus. Plauti Comoediae, Volume 2. Leo, Friedrich, editor. Berlin: Weidmann, 1896.

  1. quin, ubi nil det, pro infrequente eum mittat militia domum.
  2. nec umquam erit probus quísquam amator nisi qui rei inimicust suae.
  3. nugae sunt nisi, modo quom dederit, dare iam lubeat denuo;
  4. is amatur hic apud nos, qui quod dedit id oblitust datum.
  5. dum habeat, dúm amet; ubi nil habeat, alium quaestum coepiat.
  6. aequo animo, ipse si nihil habeat, aliis quí habent, det locum.
  7. probust amator, qui relictis rebus rem perdit suam.
  8. at nós male agere praedicant viri solere secum,
  9. nosque esse avaras. qui sumus? quid male nos agimus tandem?
  10. nam ecastor numquam satis dedit suae quísquam amicae amator,
  11. neque pol nos satis accepimus neque umquam úlla satis poposcit.