Rudens

Plautus, Titus Maccius

Plautus. Leo, Friedrich

  1. Vt piscatorem aequomst, fame sitique speque ---
Trach.
  1. --- ecquem adulescentem
  2. huc, dum hic astatis, strenua facie rubicundum fortem,
  3. qui tres secum homines duceret chlamydatos cum machaeris,
  4. vidistis vos venire --- ? ---
Pisc.
  1. Nullum istac facie ut praedicas venisse huc scimus.
Trach.
  1. Ecquem
  2. recalvom ac silanum senem, statutum, ventriosum,
  3. tortis superciliis, contracta fronte, fraudulentum,
  4. deorum ódium atque hominum, málum, mali viti probrique plenum,
  5. qui duceret mulierculas duas sécum satis venustas?
Pisc.
  1. Cum istius modi virtutibus operisque natus qui sit,
  2. eum quídem ad carnificem est aequius quam ad Venerem commeare.
Trach.
  1. At si vidistis, dicite.
Pisc.
  1. Huc profecto nullus venit.
  2. vale.—
Trach.
  1. Valete. credidi: factum est quod suspicabar,
  2. data verba ero sunt, leno abit scelestus exulatum,
  3. in navem ascendit, mulieres avexit: hariolus sum.
  4. is huc erum etiam ad prandium vocavit, sceleris semen.