Mercator

Plautus, Titus Maccius

Plautus. Plauti Comoediae, Volume 1. Leo, Friedrich, editor. Berlin: Weidmann, 1895.

  1. clam patrem patria hac effugiam, aut aliquid capiam consili.—
Evt.
  1. Vt corripuit se repente atque abiit. heu misero mihi,
  2. si ille abierit, mea factum omnes dicent esse ignavia.
  3. certumst praeconum iubere iam quantum est conducier,
  4. qui illam investigent, qui inveniant. post ad praetorem ilico
  5. ibo, orabo, ut conquaestores det mi in vicis omnibus;
  6. nam mihi nil relicti quicquam áliud iam esse intellego.—
Dorippa
  1. Quoniam a viro ad me rus advenit nuntius,
  2. rus non iturum, feci ego ingenium meum,
  3. reveni, ut illum persequar qui me fugit.
  4. sed anum non video consequi nostram Syram.
  5. atque eccam incedit tandem. quin is ocius?
Syra
  1. nequeo mecastor, tantum hoc onerist quod fero.
Dor.
  1. Quid oneris?
Syr.
  1. Annos octoginta et quattuor;
  2. et eodem accedit servitus, sudor, sitis:
  3. simul haec quae porto deprimunt.
Dor.
  1. Aliquid cedo
  2. qui hánc vicini nostri áram augeam.
  3. da sane hanc virgam lauri. abi tu intro.