Curculio

Plautus, Titus Maccius

Plautus. Plauti Comoediae, Volume 1. Leo, Friedrich, editor. Berlin: Weidmann, 1895.

  1. dicam quem ad modum conscribas. sequere me hac intro.
Phaed.
  1. Sequor.—
Lyco
  1. Beatus videor: subduxi ratiunculam,
  2. quantum aeris mihi sit quantumque alieni siet:
  3. dives sum, si non reddo eis quibus debeo.
  4. si reddo illis quibus debeo, plus alieni est.
  5. verum hercle vero cum belle recogito,
  6. si magis me instabunt, ad praetorem sufferam.
  7. habent hunc morem plerique argentarii,
  8. ut alius alium poscant, reddant nemini,
  9. pugnis rem solvant, si quis poscat clarius.
  10. qui homo mature quaesivit pecuniam,
  11. nisi eam mature parsit, mature esurit.
  12. cupio aliquem emere puerum, qui usurarius
  13. nunc mihi quaeratur. usus est pecunia.
Cvrcvlio
  1. Nil tu me saturum monueris. memini et scio.
  2. ego hoc effectum lepide tibi tradam. tace.
  3. edepol ne ego hic med intus explevi probe,
  4. et quidem reliqui in ventre cellae uni locum,
  5. ubi reliquiarum reliquias reconderem.