Curculio

Plautus, Titus Maccius

Plautus. Plauti Comoediae, Volume 1. Leo, Friedrich, editor. Berlin: Weidmann, 1895.

  1. Perdis me tuis dictis.
Cvrc.
  1. Immo servo et servatum volo.
  2. postquam mihi responsum est, abeo ab illo maestus ad forum
  3. med illo frustra advenisse. forte aspicio militem.
  4. aggredior hominem, saluto adveniens. salve inquit mihi,
  5. prendit dexteram, seducit, rogat quid veniam Cariam;
  6. dico me illo advenisse animi causa. ibi me interrogat,
  7. ecquem in Epidauro Lyconem tarpezitam noverim.
  8. dico me novisse. quid? lenonem Cappadocem? annuo
  9. visitasse. sed quid eum vis? “quia de illo emi virginem
  10. triginta minis, vestem, aurum; et pro ís decem coáccedunt minae.”
  11. dédisti tu argentum? inquam. “ímmo ápud trapezitam situm est
  12. illum quem dixi Lyconem, atque ei mandavi, qui anulo
  13. meo tabellas obsignatas attulisset, ut daret
  14. operam, ut mulierem a lenone cum auro et veste abduceret.”
  15. postquam hoc mihi narravit, abeo ab illo. revocat me ilico,
  16. vocat me ad cenam; religio fuit, denegare nolui.
  17. quid si abeamus ac décumbamus? inquit. consilium placet:
  18. neque diem decet morari, neque nocti nocerier.
  19. omnis res paratast. et nos, quibus paratum est, assumus.